Í lok ágúst verður farin ferð stómaþega yfir Laugarveginn og Fimmvörðuháls. Ferðin er skipulögð af Kanadamanninum og stómaþeganum Rob Hill og eru allir velkomnir með, hérlendis sem erlendis, í alla ferðina eða eingöngu Fimmvörðuháls. Fimmvörðuháls verður genginn á tveimur dögum og því verður það auðveldari ganga.
Um er að ræða sjö eða þriggja daga ferð sem Íslenski Fjallaleiðsögumenn halda utan um en innifalið í henni er akstur á staðinn, gisting í skálum, fæði, flutningur á farangri á milli gististaða og vissulega leiðsögn. Verðið fyrir ferðina er í kringum 278.000 krónur fyrir fulla ferð og um 89.000 krónur fyrir þá styttri. Stómasamtökin eru tilbúin að niðurgreiða kostnaðinn fyrir sína félagsmenn.
Ferðin hefst 22. ágúst og seinni hlutinn hefst 25. ágúst. Ferðinni lýkur svo 28. ágúst.
Leiðsögumaður ferðarinnar, Ágúst Kristján Steinarrsson, er jafnframt með stóma og því er um að ræða einstakan stómaviðburð sem allir stómaþegar ættu að gefa gaum.
Allir sem hafa áhuga, stómaþegar sem og vinir þeirra og vandamenn, geta haft samband við Ágúst í tölvupósti, agustkr(att)gmail.com
Hér að neðan má sjá kynningarmyndband Íslenskra fjallaleiðsögumanna af fyrri hluta ferðarinnar, af Laugarveginum. Loks er hér hlekkur með upplýsingum um ferðina, á ensku.
