Þorleifur hóf að stunda fimleika eftir að hann fékk stóma.

Þorleifur var, ólík mörgum stómaþegum, ekki búinn að hafa meltingarsjúkdóm í langan tíma áður en hann fór í aðgerð árið 2006. Tæpu ári fyrir aðgerð fór hann að greina blóð í hægðum en með hjálp lyfja náðist að halda einkennunum í skefjum. Svo veiktist hann skyndilega mjög illa sem leiddi til tveggja mánaða spítalalegu. Þegar læknarnir sögðu honum að hann þyrfti að fá stóma vissi hann ekkert hvað það var, en fékk þá staðfestingu að það myndi gefa honum heilsuna á ný.

Þorleifur segir, að fyrir utan það að hafa fengið fulla heilsu, hafi lífið lítið hafa breyst eftir að hann fékk stóma. Framan af var hann þó mjög varkár en eftir því sem tíminn leið fór hann að sjá að hann gat í raun allt með stóma. Með tímanum fór hann að stunda hlaup, eyddi miklum tíma í fjallgöngum og fjallaferðum og fór á endanum að æfa fimleika. Þá segir hann að hans helsti sigur hafi verið þegar hann tók sitt fyrsta heljastökk í fimleikum, með stóma á kvið, en síðan þá hefur stökkunum fjölgað allnokkuð.

Hann segir sig bara venjulegan strák og að hann líti alveg eins á sig nú og hann gerði áður. Hann hafi þó ör á líkama sínum sem eru vitnisburður um að lífið er ekki alltaf auðvelt og býr hann að þeim lærdómi og lífsreynslu.

Þorleifur vill koma því á framfæri að helsta hindrunin er ekki stómað, heldur hausinn. Hann segir að það sé hægt að gera allt með stóma, þetta sé bara spurning hvað maður vill gera, hvort sem það er Everest eða stuttur göngutúr. Loks hvetur hann aðra til þess að setja sér smá markmið og vinna síðan að því að ná því.

Fjöldi einstaklinga sem lifa innihaldsríku lífi með stóma er langur og hvetjandi. Hér má heyra fleiri sögur:

• Dandý – Tók þátt í Ironman 5 mánuðum eftir að hún fékk stóma
• Eva – Fer í ræktina 6-12 sinnum í viku
• Inger – Sinnir húsmóðrarhlutverkinu af alúð
• Jón – Gekk á Hvannadalshnúk og varð þar með fyrsti J-poka þeginn til að gera það
• Júlía – Ferðast um heiminn með hljómsveit sinni
• Sigurður Jón – Stundar göngur og sund reglulega
• Sonja – Er ólétt að sínu fyrsta barni
• Þorleifur – Hóf að stunda fimleika eftir að hann fékk stóma
• Jónína – Eignaðist barn ári eftir að hún fékk stóma
• Klara – Hefur stundað meiri hreyfingu eftir að hún fékk stóma
• Ágúst – Er tíður sundgestur og leikur sér mikið á fjöllum